Свята мастацтваў у Міры

У старажытнае мястэчка Мір 31 траўня прыйдзе свята мастацтваў «Мірскі замак», сёлета яно будзе шостым па ліку.

Традыцыйна ў рамках свята пройдуць навуковыя чытанні, у Доме культуры адкрыецца выстава фотамастакоў Гарадзеншчыны «Беларусь старажытная».

І старажытная музыка стане галоўным цвіком праграмы. Асобную праграму прывязе камерны аркестар Нацыянальнага канцэртнага аркестра Беларусі, якім падчас гэтага канцэрта Міхаіл Фінберг даверыць кіраваць дырыжору Валерыю Сароку.

«Музыка ў духоўнай прасторы Беларусі. Шлях праз стагоддзі» — развагі на гэтую тэму будуць асабліва плённымі ля старажытных сцен замку пад музыку, якую можна будзе паслухаць у выкананні розных камерных калектываў.

Але і жыхары раённага цэнтра Карэлічы далучацца да свята — для іх рыхтуецца вялікая праграма канцэрту з удзелам салістаў Нацыянальнага канцэртнага аркестру пад кіраўніцтвам Міхаіла Фінберга.

Паводле «Звязда»