Хрыстаса Пургурыдэса не ўпусцілі ў Мінск

Аўтар справаздачы па Беларусі ў ПАРЭ Хрыстас Пургурыдэс не меў магчымасці прыехаць у Менск, каб падрыхтаваць справаздачу для ПАРЭ.

У Парламенцкай асамблеі Рады Еўропы прадставяць справаздачу аб злоўжываннях у сістэме крымінальнага правасуддзя Беларусі. Аўтар справаздачы Хрыстас Пургурыдэс у інтэрв’ю “Радыё Свабода” паведаміў, што ў адрозненне ад таго разу, калі ён рыхтаваў папярэдні свой даклад пра Беларусь, цяпер ён ня меў магчымасці наведаць Менск і пагутарыць з прадстаўнікамі ўладаў.

МЗС Беларусі адмовіўся запрасіць яго ў краіну, нягледзячы на адпаведны запыт Сакратарыяту Рады Еўропы. Таму інфармацыю аб парушэннях пры ажыццяўленні крымінальнага правасуддзя ў Беларусі Хрыстас Пургурыдэс збіраў з даступных яму крыніц.

Галоўную выснову сваёй справаздачы ён сфармуляваў наступным чынам: “Найважнейшае пасланне гэтага дакладу палягае ў тым, што рэжым у Мінску павінен спыніць злоўжыванне крымінальнымі працэсамі ў палітычных мэтах”.

Пасля вывучэння сітуацыі спадар Пургурыдэс перакананы, што ў Беларусі шмат людзей зазнаюць крымінальны пераслед з палітычных матываў, што ў краіне надалей існуюць палітычныя вязні.

Аднак ён разумее складанасць сітуацыі і не спадзяецца, што рэзалюцыі ПАРЭ змогуць хутка палепшыць сітуацыю: “Я сапраўды не спадзяюся на такія вынікі разгляду, якія б прымусілі рэжым у Беларусі змяніць сваю палітыку заўтра ж. Я разумею, што гэта паступовы працэс, і спадзяюся, што крок за крокам нам удасца прымусіць беларускі рэжым памяняць сваю палітыку”.

Паводле “Хартыя-97”