“Будзьма дударамі!” у Мінску

Фэст пад лозунгам “Будзьма дударамі!” пройдзе ў Мінску з 24 па 27 красавіка.

На “Дударскі фэст” прыедуць дудары з Літвы, Новай Зеландыі, Балгарыі, Беларусі, Эстоніі, Польшчы, Украіны, Расіі, Латвіі і Японіі. Аб гэтым паведаміў прадзюсер фэсту Зміцер Сасноўскі на прэс-канферэнцыі, якая адбылася 9 красавіка ў Мінску.

У гэтым годзе фэст парадуе прыхільнікаў дударскага майстэрства: павялічваецца колькасць дзён фэсту да 4, павялічваецца колькасць краінаў, што бяруць удзел.

Фэст пачнецца 24 красавіка з прэс-канферэнцыі. 25 красавіка, а 19 гадзіне, ў малой залі к/з “Мінск” адбудзецца канцэрт, на якім выступяць усе ўдзельнікі “Дударскага фэсту”. 25 красавіка, а 18 гадзіне распачнецца танцавальны канцэрт у клубе “Рэактар”. 26 красавіка – міжнародная дударская канферэнцыя. І скончыцца музыкальная падзея вясны пад гукі дудаў (валынак) у клубе “Катакомбы”. Па выніках фэсту плануецца выданне зборніка дакладаў канферэнцыі, аўдыёзапіс фестывалю і відэафільма “Дударскі фэст 1992–2008”. Таксама ў гэтым годзе мяркуецца завершыць стварэнне Дударскага таварыства Св.Васіля.

Унікальнасць усёй працы, якую робяць беларускія дудары па адраджэнні гэтай традыцыі ў тым, што ніякіх запісаў да нашых часоў не захавалася, і любыя звесткі і ноты для дуды з’яўляюца вельмі каштоўнымі і ўнікальнымі. Суцяшае той факт, што валынка для Беларусі адраджаецца праз аматараў, якія шмат высілкаў аддаюць на тое, каб вырабляць самім інструменты, каб вучыць новае пакаленне дудароў. І ў справе адраджэння дуды з нашымі майстрамі лічацца ў Еўропе.

Падтрымку фэсту аказваюць “Згуртаванне беларусаў свету “Бацькаўшчына”, Беларуская музычная альтэрнатыва, Беларускі партал “Tut.by”, фірма “Adidas” ды іншыя арганізацыі.

Інфармацыйны цэнтр МГА “ЗБС “Бацькаўшчына”