Еўрасаюз працягнуў санкцыі для Беларусі

Рада Еўрасаюза працягнула да 10 красавіка 2009 году візавыя абмежаванні для шэрагу высокапастаўленых чыноўнікаў Беларусі. Рашэнне рады тычыцца таксама замарожвання іх фінансавых актываў.

У афіцыйным каментары гаворыцца, што гэтае рашэнне грунтуецца на мерах, уведзеных у 2004 годзе адносна чыноўнікаў, якія вінаватыя ў фальсіфікацыі выбараў і рэферэндуму 2004 года, парушэнні міжнародных выбарчых стандартаў на выбарах у сакавіку 2006 года і ціску на грамадзянскую супольнасць і падаўленні супраціву дэмакратычнай апазіцыі.

Спіс асобаў, якіх тычацца візавыя абмежаванні, застаецца нязменным. Аднак ён можа быць дапоўнены ў любы час на падставе пэўных крытэраў у ацэнцы наступных падзеяў.

Рада і Еўракамісія прывіталі таксама вызваленне пяці з шасці прызнаных міжнароднай супольнасцю палітзняволеных у Беларусі. Рада і Еўракамісія таксама заявілі пра неабходнасць безумоўнага вызвалення ўсіх палітзняволеных у Беларусі, што разглядалася б як канкрэтны крок да павагі еўрапейскіх каштоўнасцяў, дэмакратыі і правоў чалавека. Гэта дазволіла б перагледзець абмежавальныя меры адносна чыноўнікаў у Беларусі.

Рада і Еўракамісія ў гэтым звязку таксама звяртаюць увагу на парламенцкую выбарчую кампанію, якая павінна быць праведзена згодна з міжнароднымі выбарчымі стандартамі. Гэта магло б стаць падставай для далейшых станоўчых крокаў.

Рада і Еўракамісія нагадваюць, што гэтае рашэнне можа быць перагледжана ў звязку з палітычнымі падзеямі ў Беларусі.

“Вызваленне ўсіх палітычных зняволеных і правядзенне ў верасні 2008 года парламенцкіх выбараў забяспечыла б пэўныя магчымасці для такога перагляду”, – гаворыцца ў паведамленні Рады Еўрасаюза і Еўракамісіі.

Паводле “Радыё Свабода”