Ларыса Геніюш – усё яшчэ вораг для ўладаў

У 14:00 у Петрапаўлаўскім саборы Мінску адбылася памінальная малітва па Ларыса Геніюш якая памерла 7 красавіка 1983 году, так і не прыняўшы савецкага падданства. Пахаваная яна была ў Зэльве.

У 1999 годзе Беларускі Хельсінскі камітэт звярнуўся ў Пракуратуру Беларусі з хадайніцтвам аб адмене несправядлівага прысуду ў адносінах да Ларысы і Янкі Геніюшаў («контррэвалюцыйная арганізацыйная дзейнасць» і «дапамога міжнароднай буржуазіі ў ажыццяўленні варожай дзейнасці»).

Паўторны зварот грамадскасці аб рэабілітацыі паэткі ў 2007 годзе таксама атрымаў адмову. Але прычыны засталіся невядомыя, бо, паводле ліста з Вярхоўнага суда, «яны могуць быць паведамленыя толькі самой рэпрэсаванай».

Сябры аргкамітэту па стварэнні партыі Беларуская Хрысціянская Дэмакратыя правялі акцыю памяці. Побач з будынкам філармоніі ў Мінску яны ўсталявалі партрэт паэткі, аздоблены бел-чырвона-белымі кветкамі, і прачыталі вершы. Мінакам яны раздалі каля 200 улётак з вершамі і біяграфіяй Ларысы Геніюш.

У тэксце, ў прыватнасці, паведамлялася пра яе грамадска-палітычную дзейнасць у Чэхіі і працу Генеральным сакратаром Ураду Беларускай Народнай Рэспублікі ў эміграцыі, а таксама пра тое, што праваабарончыя арганізацыі Беларусі двойчы звярталіся ў Пракуратуру і Вярхоўны суд аб рэабілітацыі паэткі, аднак гэтага зроблена не было.

“Ларыса Геніюш даўно няма на гэтым свеце. Даўно імя славутай паэткі і патрыёткі Бацькаўшчыны сталася легендай для беларусаў. А для ўлады яна па-ранейшаму вораг. І рэабілітацыі не падлягае!” – гаворыцца ў паведамленні.

Паводле “Радыё Свабода” і “Наша Ніва”