Дыскусія “Незалежная культура ў сучаснай Беларусі” пройдзе ў Мінску

13 красавіка ў мінскім Міжнародным адукацыйным цэнтры пройдзе дыскусія на тэму “Незалежная культура ў сучаснай Беларусі”.

“Арганізатарамі сустрэчы з’яўляюцца інтэрнэт-супольнасць “Трэці Шлях” і нямецкая арганізацыя “Культур Актыў”, -– распавёў карэспандэнту Пагоні каардынатар “Тряцяга шляху” Павел Марозаў. – Дыскусія, на мой погляд, даволі актуальная, бо даволі часта з назоўнікам “артыст” асацыюецца прыметнік “бедны”. Наўрад ці, гэтае словазлучэнне можна ўжыць у дачыненні да прадстаўнікоў масавай поп-культуры. А што наконт незалежнай культуры... Тут мноства пытанняў. Ці можа яна таксама з’яўляцца камерцыйнай і на колькі? Ці прыносіць незалежная творчасць акрамя “духоўнай ежы” яшчэ і матэрыяльную? На колькі спрыяюць гэтаму беларускія эканамічныя і сацыяльныя умовы? Як выглядае гэтая сітуацыя ў Германіі? На гэтыя і іншыя пытанні і адкажуць прадстаўнікі незалежнай беларускай культуры Артур Клінаў, Святлана Бень (“Серебряная свадьба”), Влад Бубен, Лёня Паўлёнак (Нагуаль) а таксама нямецкі музычны менеджэр Mirko Sennewald”.

Паводле газеты “Пагоня”