Хведар Нюнька святкуе 80-годдзе

6 красавіка святкуе сваё 80-годдзе нязменны кіраўнік Таварыства беларускай культуры Літвы, вядомы грамадскі дзеяч беларускай дыяспары Хведар Нюнька.

Ён нарадзіўся ў 1928 г. у вёсцы Алешавічы Мастоўскага раёна, а з 1934 г. жыве ў Вільні. З 1980-х гг. вядзе актыўную дзейнасць па адраджэнні беларускасці ў Літве. У 1989 г. сп. Хведар стаў адным з ініцыятараў заснавання Таварыства беларускай культуры ў Вільні. Менавіта яго намаганнямі ў ТБК і яе Раду ўвайшлі вядомыя ў літоўскім грамадстве людзі, нашчадкі беларускай інтэлігенцыі пачатку XX ст. – Лявон і Юрка Луцкевічы, Лявон Кароль, Яраслаў Станкевіч, Сяргей Карабач, Мікола Рулінскі. Сп. Нюнька з’яўляецца ініцыятарам вялікай колькасці грамадскіх, культурных акцый у Літве, актыўна прапагандуе беларускую культуру, прыкладае шмат намаганняў дзеля ўшанавання памяці беларускіх грамадскіх і культурных дзеячаў у Вільні. У 1997 г. ён стаў сябрам Рады БНР. Сябра Вялікай Рады МГА “ЗБС “Бацькаўшчына”, Беларускага Народнага Фронту.

Ад імя управы МГА "ЗБС "Бацькаўшчына" віншуем Вас з юбілеем. Зычым здароўя, душэўных сіл, каб вашае меркаванне надалей заставалася важным для беларусаў Літвы, каб ажыццявіліся планы, звязаныя з па прапагандай беларускасці ў свеце.

Управа МГА "ЗБС "Бацькаўшчына"