Мінск развітаўся з Ірынай Казулінай

26 лютага з 8 вечара сябры, знаёмыя, калегі Ірыны Казулінай маглі развітацца з ёй у Чырвоным касцёле Мінска. Бязмежная чарга людзей, якія ўскладаюць да труны бел чырвона белыя кветкі, бел чырвона белыя вянкі прыходзіла ў касцёл да позняга вечара. Развітанне з Казулінай працягнулася зранку 27 лютага, а 9-ай гадзіне. З-за вялікай колькасці жадаючых праводзіць Ірыну ў апошні шлях, прыйшлося перанесці прыблізна на поўгадзіны памінальную імшу. У 13-50 труну вынеслі з Чырвонага касцёла, і пранеслі праз жывы калідор людзей, якія выстраіліся ў чаргу ад касцёла да катафалка. За труной ідуць Аляксандр Казулін з дачкамі Вольгай і Юліяй, маці Ірыны, родныя і блізкія. У жалобнай працэсіі ідуць амбасадары ЗША Карэн Ст'юарт, Ізраіля - Зэеў Бэн-Ар'е. Пасля таго як труну паклалі ў катафалк Аляксандр Казулін звярнуўся са словамі падзякі да прысутных: “Я ніколі ні перад кім не станавіўся на калені, а перад вамі, перад тымі, хто сёння прыйшоў праводзіць маю жонку ў апошні шлях, я стану, – Аляксандр Уладзіслававіч і на самай справе стаў на асфальце на калені. – Мая Ірына – вельмі мужны чалавек. Так, магчыма ў тым, што яна адыйшла ў іншы свет ёсць і мая віна, але сваім прыкладам яна паказала, што такое каханне, што такое любоў, што такое вернасць. Ірына памерла 23 лютага, у Дзень абаронцаў Айчыны. Гэта маленькая, хударлявенькая жанчына паказала нам чалавечую нязгібнасць. Можа хоць гэта зварушыць што-небудзь у душах і сэрцах беларусаў. Бог даў нам жыццё і права на свабоду, і я сёння вам шчыра заяўляю: “Я буду змагацца за свабоду да апошняй кроплі крыві”. І тут мяне на калені не паставіць ніхто.” Жалобная працэсія з 4 аўтобусаў і каля 50 легкавых машын паехала на старыя вясковыя могілкі ў вёску Тарасава, што недалёк ад Мінска, дзе цела Ірыны Казулінай знойдзе свой апошні пакой. На саміх могілках ксёндз Уладзіслаў Завальнюк благаславіў магілу. Пасля чаго слова ўзяў Аляксандр Казулін. Яго прамова была надзвычай эмацыйнай. Людзі плакалі. Аляксандар Казулін падкрэсліў, што Ірына ахвяравала жыццём дзеля яго, заклікаў усіх да міласэрнасці, любові да бліжніх. Пад малітву, пад спевы людзі сябры развітваюцца з Ірынай Казулінай.

Пад словы ксяндза Уладзіслава Завальнюка "Няхай усемагутны Божа дасць табе, сястра наша Ірына, піць з крыніцаў жыцця вечнага" труну з целам Ірыны Казулінай апусцілі ў зямлю.