Сідорскі і Фрадкоў праводзяць перамовы адзін на адзін

У Маскве ў Доме Урада аднавіліся перамовы кіраўнікоў урадаў Беларусі і Расіі па крызісных пытаннях. Напярэдадні, у чацвер, 11 студзеня, расійскі і беларускі бакі правялі перамовы на ўзроўні міністраў, пазней на ўзроўні прэм’ер-міністраў краін. Прэм’еры абодвух краін спадзяюцца выпрацаваць сёння, 12 студзеня, рашэнні асноўных праблем у двухбаковых адносінах.

11 студзеня ў перамовах быў абвешчаны тэхнічны перапынак да 10 гадзін раніцы па мінскім часе. Па паведамленнях расійскіх СМІ, гэты час Сяргей Сідорскі выдзеліў на кансультацыі з Аляксандрам Лукашэнкам па тэлефоне з амбасады Беларусі ў Расіі.

Падчас пачатку перамоў адбыўся інцыдэнт: расійскія прадстаўнікі патрабавалі выдаліць ўсіх журналістаў адразу пасля ўступнага слова Міхаіла Фрадкова, такім чынам уступная прамова Сяргея Сідорскага засталася не пачутая.

“Нашы перамовы заўсёды адрозніваліся прагматычным падыходам з улікам інтарэсаў нашых краін. На жаль, у апошні час нешта не спрацавала, і я вам адкрыта скажу, у выніку пацярпеў імідж Расіі як надзейнага пастаўшчыка энергарэсурсаў”, — сказаў Міхаіл Фрадкоў.

“Я гэта кажу для таго, каб з ўсёй адказнасцю падысці да рашэння пытання, за якім глядзяць грамадзяне і нашых краін, і міжнароднай супольнасці”, — заявіў 11 студзеня прэм’ер-міністр Расіі.

Пры гэтым Міхаіл Фрадкоў выказаў надзею, што ў выніку перамоў атрымаецца знайсці ўзаемавыгаднае рашэнне пытанняў. “Вельмі хацелася б знайсці збалансаванае, зразумелае ўсім рашэнне, каб інтарэсы нашых краін былі выкананыя, каб гэтае рашэнне было празрыстым, сапраўды зразумелым і выцякала з неабходнасці працягваць супрацоўніцтва з улікам інтарэсаў развіцця эканомік нашых краін”, — лічыць Міхаіл Фрадкоў.

Паводле telegraf.by