Стваральнік мультфільмаў аб Лукашэнку просіць палітычнага сховішча ў Эстоніі

28-гадовы Павел Марозаў, які стварыў серыю мультфільмаў, якія высмейваюць прэзідэнта Беларусі, прыбыў у сераду ў Талін, дзе папрасіў палітычнага прытулку. Такое рашэнне беларускі апазіцыянер прыняў пасля таго, як беларускія ўлады на мінулым тыдні прад’явілі абвінавачванне ў абразе прэзідэнта актывістам моладзевай арганізацыі “Трэці шлях”.

Як піша “Хартыя 97” са спасылкай на эстонскую газету Eesti Paevaleht, у выпадку вяртання на радзіму за абразу прэзідэнта Паўлу Марозаву пагражае да чатырох гадоў пазбаўлення волі.

Па словах эстонскага грамадскага актывіста Яўгенія Крыштафовіча, які ў лютым зрабіў даклад па Беларусі для камісіі па замежных справах парламента Эстоніі, беларускія ўлады раздражняе дзейнасць маладога чалавека па правядзенні ў жыццё сваіх ідэй. “Усе астатнія, звязаныя з гэтай справай людзі, ужо з’ехалі. Павел быў, вядома, адным з тых, каму трэба было эмігрыраваць”, — падкрэсліў ён.

Пры гэтым адзін з вядомых мінскіх адвакатаў, да якога звярнуўся аўтар сатырычных мультфільмаў, адмовіўся яго абараняць. “Сказаў проста, што ў палітычнай справе няма магчымасці мяне абараніць”, — растлумачыў адмову адваката Павел Марозаў.

Малады чалавек адначасова атрымаў згоду на атрыманне ім палітычнага прытулку ад Эстоніі і Германіі. Тым не менш, ён абраў прыбалтыйскую краіну, бо на момант ад’езду ў яго была адчыненая эстонская віза. Таксама, па яго словах, у Эстоніі яму зручней працягваць сваю дзейнасць.

“Я не збіраюся спыняць актыўную працу па дэмакратызацыі Беларусі. Эстонія падавалася для гэтага лепшым выбарам”, — сказаў ён.

Паводле “Eesti Paevaleht” і
“Хартыя 97”