Парыж гаворыць — Беларусь! (Фота)

На працягу тыдня ў Парыжы праходзіў фэст “Мы гаворым — Беларусь!”, які быў прымеркаваны да традыцыйнага Дня беларускай салідарнасці, які праводзіцца 16-га кожнага месяца. Фестывальная праграма ўключала ў сябе больш дзесятка культурных і грамадскіх мерапрыемстваў, якія праводзіліся ў розных залах французскай сталіцы.

Дні салідарнасці з Беларуссю, якія штомесяц праводзяцца грамадскімі, палітычнымі і культурнымі арганізацыямі ў Еўропе і Паўночнай Амерыцы, у апошні час перайшлі са спісу лакальных палітычных акцый у спіс буйных грамадска-культурных мерапрыемстваў. У іх удзельнічае ўсё больш палітыкаў, грамадскіх дзеячаў і дзеячаў культуры першай велічыні.

Варшаўскі канцэрт рок-музыкаў у падтрымку Беларусі, пры ўдзеле Анджэя Вайды; выступ беларускіх акцёраў і музыкаў на сцэне Шведскага каралеўскага тэатра; праект “Музыкі свету ў падтрымку Беларусі”, які стартаваў з выступу ў Мінску тройкі вядучых еўрапейскіх DJ; прэзентацыя п’ес беларускіх драматургаў у Нью-Йорку, якая праходзіла пад патранажам Тома Стопарда — гэта толькі няпоўны пералік апошніх культурных падзей, што адбыліся ў рамках Дня салідарнасці.

Фэст “Мы гаворым — Беларусь!” паспрабаваў пазнаёміць парыжан не толькі з прадстаўнікамі беларускай контр-культуры, але і далучыць французаў у дыскусію аб тым, якімі могуць быць узаемаадносіны паміж Беларуссю і Францыяй; чым могуць дапамагчы прадстаўнікі французскага грамадства ў справе вяртання дэмакратыі ў Беларусь; наколькі цікавая для Францыі беларуская культура.

Праграма фэсту была насычанай і разнастайнай: фотавыстава, спектакль, канцэрты, кінапаказы, дыскусіі. Усе мерапрыемствы нязменна праходзілі пры перапоўненых залах і выклікалі вялікую цікавасць парыжан.

Канцэрты Зміцера Вайцюшкевіча з яго “WZ-аркестрам” і Касі Камоцкай прайшлі пры аншлагах і былі падтрыманыя авацыямі на працягу ўсяго выступу беларускіх музыкаў. Перад іх выступленнямі адбыўся паказ прац беларускага кінарэжысёра-дакументаліста Юрыя Хашчавацкага. Французскай публікай была запоўнена зала “Дому Еўропы і Усходу”. Прысутныя паглядзелі фільм “Звычайны прэзідэнт” і працоўны матэрыял новага фільма рэжысёра “Пляц Каліноўскага”. Пасля паказу гледачы не адпускалі рэжысёра на працягу двух гадзін, закідваючы яго пытаннямі.

На працягу ўсяго часу фэсту ў Парыжы працавалі дзве фотавыставы, якія знаёмілі французаў з жыццём і людзьмі Беларусі. Адна з выстаў прадстаўляе працы фотамастака Джэфа Баніфацына (партрэты галоўных дзеячаў нефармальнага мастацтва Беларусі).

Кульмінацыяй фэсту стаў паказ спектакля “Вольнага тэатра” “Пакаленне Jeans”, які праходзіў у Theatre-Studio (зараз гэта рэзідэнцыя “Вольнага тэатра” у Заходняй Еўропе). На сцэне гэтага тэатра запланаваныя прэм’ерныя паказы падчас вясенніх гастроляў “ВТ” ў Парыжы. Запланавана паказаць каля 20-і спектакляў.

Дзелячыся ўражаннем ад спектакля, Крысціян Бенедэцці сказаў: “Падчас падзення Берлінскай сцяны я быў у нямецкай сталіцы, і ўсе мы стаялі ў чэргах за абломкамі разбуранага знака таго часу. Тады кожны з нас атрымаў на памяць па кавалачку Турмы. На спектаклі “Пакаленне Jeans” мне працягнулі джынсавую стужачку і я зразумеў, што гэтым разам атрымаў у падарунак кавалачак сапраўднай Волі”.

Парыжскі праект стаў магчымы шмат у чым дзякуючы запалу дырэктара праекту — Ганне Дідзье, якая не хавала добраахвотніцкую аснову акцыі: “Перавага беларускага праекту — у яго прастаце: мінімальная колькасць сродкаў і максімум вынаходлівасці. Акрамя таго, усё адбылося дзякуючы духу салідарнасці, які панаваў паміж арганізатарамі, удзельнікамі праекту і парыжан публікай. Мы ведалі, што зможам дагрукацца да парыжан, але не маглі выказаць здагадку, што іх увага і падтрымка апынуцца настолькі гарачымі”.

Дырэктар “Вольнага тэатра” Наталля Каляда запальвае свечкі Салідарнасці

Мікалай Халезін у спектаклі “Пакаленне Jeans”

Зміцер Вайцюшкевіч

Гледачы падчас выступу беларускіх музыкаў

Кіраўнік праекту “Мы гаворым — Беларусь!” Ганна Дідзье