Сёння стартуе фестываль “be2gether”

У літоўскай вёсцы Нарвілішкі, што літаральна ў 40 мэтрах ад беларускай мяжы, разам з такімі вядомымі ва ўсім свеце праектамі, як “Morcheeba”, “Therapy?” і “Bloodhoung Gang”, выступяць тры беларускія гурты. Гэта – “Ляпіс Трубяцкой”, “Drum Ecstasy” і “IQ48”.

Удзел у фэсце возьмуць больш за 30 гуртоў і выканаўцаў з Еўропы і ЗША. Фэст праходзіць пад лозунгам “Музыка адкрывае межы” і мае на мэце прадэманстраваць еднасць еўрапейскай музычнай культуры.

Некалькі тыдняў таму беларускае МЗС распаўсюдзіла заяву, у якой заклікала літоўскія ўлады не дапусціць правядзенне на фестывалі “be2gether” ідэалагічных акцый антыбеларускай скіраванасці. А сёння беларускія памежнікі паведамілі, што правядзенне фестывалю не станецца прычынай узмацнення аховы дзяржаўнай мяжы.

Паводле “Тузіна Гітоў” (music.fromby.net)