Мілінкевіч абраны кіраўніком руху “За свабоду!”

Удзельнікі ўстаноўчага сходу паспелі прыняць статут і абраць кіроўныя органы Pуху “За Свабоду!” да таго, як у памяшканне ўварваліся міліцыянты.

Сход у Горадні пачаўся ў 10.00. Было каля 70 дэлегатаў з усёй краіны.

Праз 30 хвілін пасля пачатку ў дзверы будынку, дзе адбываўся сход, пачала грукаць міліцыя. Пасля дэлегатаў папрасілі пакінуць будынак, матывуючы гэта тым, што ён замінаваны. Каля будынку было 6 міліцэйскіх машынаў, 2 машыны хуткай дапамогі.

Пакуль міліцыя ламілася ў дзверы, дэлегаты паспелі прагаласаваць па ўсіх неабходных пытаннях.

Сябар аргкамітэту Павал Мажэйка паведаміў, што ўдзельнікі ўстаноўчага сходу паспелі прыняць статут і абраць кіроўныя органы Pуху “За Свабоду!”.

Паводле словаў Aляксандра Мілінкевіча, удзельнікі ўстаноўчага сходу зразумелі, у чым рэч і таму ад пачатку правялі галасаванне, а пасля адамкнулі дзверы.

Кіраўніком Pуху “За свабоду” стаў Аляксандр Мілінкевіч, яго намеснікамі – Вiктap Карнеенка і Юрась Губарэвіч.

Апроч устаноўчага сходу органамі правапарадку былі сарваныя ўступныя іспыты, якія ладзіла адукацыйная арганізацыя Саюзу палякаў “Polska macierz szkolna”, на якіх прысутнічала консул Польшчы. На вуліцу вывелі таксама работнікаў камерцыйных фірмаў, якія арэндуюць там памяшканні, і вахцёрку.

Як паведамілі міліцыянты П. Мажэйку, міліцыянты папярэдзілі ўдзельнікаў устаноўчага сходу руху “За свабоду!”, што не дазволяць ім болей сёння зайсці ў памяшканне. Супрацоўнікі МУС патлумачылі, што пошук выбуховай прылады можа цягнуцца два дні.

Паводле “Нашай Нівы” ( www . nn . by )