Міжнародны Дзень Салідарнасці

Нагадаем, што ў 16-ты дзень кожнага месяца прадстаўнікі грамадзянскай супольнасці Беларусі прапанавалі праводзіць Дзень салідарнасці з беларускімі палітвязнямі, зніклымі апазіцыянерамі і іх сем’ямі, незалежнымі журналістамі, з усімі, хто змагаецца за свабоду і дэмакратыю ў Беларусі. У гэты дзень, а 20-ай гадзіне арганізатары прапануюць усім выключыць на 15 хвілін святло і паставіць на падваконне запаленую свечку.

Вось ужо трэці раз адбыўся Дзень салідарнасці. Але ў гэты раз не без перашкодаў... Напрыклад, студэнтам усімі магчымымі спосабамі перашкаджалі прыняць удзел у акцыі. Па паведамленнях прэс-службы руху “Зубр”, адміністрацыі 5-га і 6-га інтэрнатаў Беларускага дзяржаўнага тэхнічнага універсітэта забаранілі студэнтам выходзіць з інтэрнатаў пасля 18-ай гадзіны. Акрамя таго, у адпаведнасці з загадам, з гэтага часу і да 20.30 ва ўсіх пакоях павінна быць уключана святло.

Тым не менш, па інфармацыі ў газеце “Пагоня” (pahonia.promedia.by), 16 снежня а 20-ай гадзіне ў вокнах многіх беларусаў на 15 хвілін патухла святло і загарэўся маленькі агеньчык свечкі.

Акцыю падтрымалі ў Гродна, Брэсце, Віцебску, Гомелі, Магілёве, Вілейцы, Барысаве, Светлагорску, Асіповічах, Паставах, Белаазерску, Салігорску, Жодзіна, Оршы, Заслаўі, Мар’інай Горцы, Івацэвічах, Бярозе, Бабруйску, ва ўсіх раёнах Мінска.

У Маскве акцыя адбылася 16 снежня а 19-й гадзіне ля амбасады Беларусі на вуліцы Марасейка.

Акцыі салідарнасці з Беларуссю прайшлі ў гэты дзень у шматлікіх кропках планеты. Свечкі свабоды запаліліся ў ЗША, Канадзе, Нідэрландах, Германіі, Швецыі, Славакіі, Польшчы, Украіне, Расіі, Літве, Эстоніі, Венгрыі, Бельгіі, Вялікабрытаніі.

А па інфармацыі з радыё “Палонія” (www.radio.com.pl/polonia/by), акцыя была праведзена прыблізна ў 20-ці беларускіх гарадах, але не была масавай.

І ўсё ж, салідарнасць з беларусамі выказваюць некаторыя замежныя палітыкі і арганізацыі. У Польшчы — прафсаюз "Салідарнасць", які ўзяў патранат над Днём салідарнасці ў Варшаве. Акцыя адбылася ў пятніцу вечарам, і ўдзел у ёй узялі прыблізна сто чалавек. Дэманстрацыю ладзілі супольна студэнты з Польшчы, Беларусі, Украіны. “Мы сабраліся тут з беларусамі, каб паказаць, што яны не адзінокія ў сваёй барацьбе за свабоду і што могуць разлічваць на падтрымку Польшчы, так як Польшча магла разлічваць і мела падтрымку дэмакратычных краін”, — кажуць удзельнікі дэманстрацыі. Яны нават прынеслі з сабою транспаранты і сцягі, а ля помніка Юзэфу Пілсудскаму запалілі свечкі.

Рада Еўропы, у апошнія дні, выказала занепакоенасць па парушэнні правоў чалавека ў Беларусі, пасля ўвядзення паправак у Крымінальны кодэкс. Бо імі яшчэ мацней абмяжоўваюць права свабоды сходаў і свабоды слова.

Паводле: Радыё “Палонія”, газета “Пагоня”,
www.maskva.com

Салідарныя ў...

Познані...

Падтрымалі акцыю салідарнасці ў Познані Беларускі Культурна-асветніцкі цэнтр, Маладыя Дэмакраты, НЗС (Незалежнае студэнцкае задзіночанне) і ЗДБ (звяз на карысць Дэмакратыі ў Беларусі). Сябры гэтых арганізацый сабраліся ў чарговы раз на плошчы імя Адама Міцкевіча. Удзельнікі запалілі знічкі і трымалі партрэты зніклых апанентаў улады. Пасля заканчэння акцыі са свечак было выкладзена сэрца — сэрца надзеі для вольнай Беларусі. У межах дня “карысных учынкаў для дэмакратычнай Беларусі”, які ў дадатку да дня салідарнасці прапанаваў праводзіць Беларускі Цэнтр у Познані, абвешчана пра пачатак працы над выданнем беларускага перакладу “Вінні Пуха”(Winnie-the-Pooha). Прэзентацыя плануецца на вясну.

Віталь Воранаў

aqweqweqweq

Беларускі Культурна-Асветніцкі Цэнтр у Познані

Іншых гарадах Еўропы...

Беларуская грэка-каталіцкая грамада ў Антверпене таксама далучылася да акцыі салідарнасці. А восьмай гадзіне ў капліцы пры царкве Святога Сэрца Ісуса Хрыста была запалена ўрачыстая свечка і адслужаны малебен за Беларускі народ.

Акцыя салідарнасці “16” атрымала шырокую падтрымку хрысціянскай супольнасці. Так у Польшчы ў Любліне група грэка-каталікоў і рыма-каталікоў (беларусаў і палякаў) а 20 гадзіне запаліла свечкі і малілася ў духу салідарнасці з усім зняволеным Беларускім народам, успамінаючы асабліва ўсіх зніклых пакутнікаў і апазіцыянераў.

Хрысьціянская Італія таксама далучылася да малітвы за Беларусь. Міжканфесійная група, што назвала сябе “Candela 16” (Сьвяча 16), у сваім звароце зазначае: “Узгадваем усе ахвяры рэжыму, усіх пераследаваных і зніклых, усіх вязняў сумлення. Молімся за ўвесь Беларускі народ, за поўную свабоду для Беларусі. З радасцю даведваемся, што многія хрысціянскія цэрквы ў Беларусі з’ядналіся ў малітве за свабоду Беларускага народу і за захаванне поўнай незалежнасці вашае Краіны”.

Паводле http://unija.info