Электронная бібліятэка МГА “ЗБС “Бацькаўшчына” задумана як найбольш поўны збор матэрыялаў з мінулага і сучаснасці беларускага замежжа. Сабраныя тут разнастайныя публікацыі дадуць магчымасць навукоўцам і проста зацікаўленым асобам атрымаць як мага больш поўную інфармацыю па гісторыі, літаратуры, мастацтве, адукацыі, друку і іншых аспектах жыцця суайчыннікаў у той ці іншай краіне. Акрамя таго, у бібліятэцы плануецца змяшчаць у электронным выглядзе рэдкія выданні, што выходзілі ў розныя часы па-за межамі Беларусі і амаль не траплялі ў метраполію. Такім чынам беларускае замежжа стане крыху бліжэй для суайчыннікаў у Беларусі, а беларускія дыяспары ў розных краінах змогуць зразумець значнасць свайго ўнёску ў нацыянальную культуру і гісторыю.

Для ўзбагачэння калекцый бібліятэкі МГА “ЗБС “Бацькаўшчына” звярталіся і зноў звяртаюцца да суполак беларусаў у замежжы, а таксама ўсіх, хто можа дапамагчы ў справе папаўнення фондаў. Для гэтага патрэбныя любыя матэрыялы, якія маюць дачыненне да жыцця і дзейнасці суайчыннікаў за мяжой (мастацкая, навукова-даследчая літаратура, газеты і часопісы, асобныя публікацыі любога перыяду, якія выдаваліся беларускімі суполкамі і дзеячамі) або, пры магчымасці, іх электронныя варыянты.

Стваральнікі бібліятэкі імкнуцца зрабіць яе зручнай для пошуку неабходнай чытачам інфармацыі. Была распрацаваная адмысловая структура размяшчэння публікацый у адпаведнасці з іх відам (даследаванні, мастацкая літаратура, успаміны, дакументы, інтэрвію, эпісталярыі і г.д.), тэматыкай (гісторыя, культура, мова, адукацыя, мастацтва і г.д.), краінай, пра якую ёсць інфармацыя ў тым ці іншым тэксце. Ствараюцца таксама магчымасці пошуку кніг некаторых выдавецтваў. Зборнікі і вялікія кнігі з разнастайным паводле структуры і тэматыкі зместам у бібліятэцы падзеленыя на асобныя артыкулы ці часткі і суаднесеныя з адпаведнымі раздзеламі для больш зручнага пошуку матэрыялаў па той ці іншай тэме.

Электронная бібліятэка МГА “ЗБС “Бацькаўшчына” толькі пачынае шлях да ператварэння ў магутны інфармацыйны рэсурс па праблемах беларускага замежжа. Нам вельмі патрэбная любая дапамога, у тым ліку і заўвагі наконт змешчаных тэкстаў, структуры бібліятэкі, магчымасцяў пошуку, планаў размяшчэння публікацый. Усе свае заўвагі і прапановы дасылайце на адрас: This e-mail address is being protected from spambots, you need JavaScript enabled to view it

Апошнія паступленні

. Урачыстасьць у садзе : драматургія беларускай эміграцыі ХХ стагодзьдзя. Мінск: Бібліятэка Бацькаўшчыны, 2007 У зборнік увайшлі драматургічныя творы і пераклады, ство- раныя беларускімі пісьменьнікамі на эміграцыі. Пераважная большасьць іх раней былі апублікаваныя толькі ў пэрыядычным эміграцыйным друку і мелі абмежаванае выйсьце да чытача. Кніга «Ўрачыстасьць у садзе» – чатырнаццатая ў сэрыі «Бібліятэка Бацькаўшчыны», заснаванай МГА «ЗБС «Баць- каўшчына» ў 2004 г.

Барадулін Рыгор. Навошта. Мінск, 2009 Кніга вершасказаў Рыгора Барадуліна, аздобленая фотаздымкамі Джона Кунстадтэра.

Вячорка Вінцук, Садоўскі Пётра. Чытанка для дзіцячага садка. Мінск, 2008 Творы «Чытанкі» прыдатныя для чытання, распавядан- ня, завучвання на памяць пры засваенні ведаў, выпрацоўцы навыкаў і ўменняў, знаёмстве з краінай і малой радзімай, пры- родаю, прафесіямі, адзеннем, асабістай гігіенай і г. д. Ёсць тво- ры, прыдатныя для ладжання святаў і гульняў. Выхавальнікі ці бацькі самі выберуць тэксты, даступныя дзецям з розным веданнем беларускай мовы.

Гардзіенка Алег. Беларускі кангрэсавы камітэт Амэрыкі (БККА). Смаленск: Бібліятэка Бацькаўшчыны, 2009 У кнізе распавядаецца пра адну з найбуйнейшых беларускіх арганізацыяў у ЗША — Беларускі кангрэсавы камітэт Амэрыкі, што дзейнічае ад 1951 г. па сёньня. Аўтар разглядае гісторыю арганізацыі на фоне падзеяў жыцьця беларускай эміграцыі, палітычнага й царкоўнага расколу, а таксама замежнай і ўнутранай палітыкі ЗША.

Гардзіенка Наталля . Беларусы ў Вялікабрытаніі. Мінск: Бібліятэка Бацькаўшчыны, 2011 Гэта кніга, 18-я ў серыі «Бібліятэка Бацькаўшчыны», прысвечана мінуламу і сучаснасці беларускай дыяспары ў Вялікабрытаніі. Аўтар разглядае гісторыю беларуска-брытанскіх кантактаў, перадумовы прыезду беларусаў у гэтую краіну ў 1940-я, працэс стварэння і дзейнасць нацыянальных арганізацый розных напрамкаў. Кніга адрасавана навукоўцам, выкладчыкам, студэнтам і шырокаму колу аматараў гісторыі эміграцыі і айчыннай гісторыі.

Гарэцкі Радзім. Браты Гарэцкія. Мінск: Бібліятэка Бацькаўшчыны, 2008 Кніга прысвечана жыццю і дзейнасці выдатных дзеячаў беларускага нацыя- нальнага руху ХХ стагоддзя братоў Гарэцкіх: Максіма Іванавіча — класіка беларускай літаратуры, літаратуразнаўцы, крытыка, рэдактара-выдаўца, мовазнаўца, фалькларыста, педагога, публіцыста, грамадскага дзеяча; Гаўрылы Іванавіча — аднаго з заснавальнікаў Беларускай акадэміі навук, вядомага эканаміста, дэмографа, геолага, географа, археолага, грамадскага дзеяча. Кніга разлічана на шырокае кола чытачоў.

Кірвель Анатоль. Гукі жыцця. Мінск: Беларускі кнігазбор, 2004 Новы век — новая проза? Так здаралася заўжды напрыканцы старога ці на пачатку новага стагоддзя. Беларуская літаратура, пазбаўляючыся догмаў, не стаіць у баку ад гэтага працэсу. Сярод тых, хто тым ці іншым чынам спрыяе пошуку новых, больш аптымальных форм уздзеяння на чытача, беларускі пісьменнік з Санкт-Пецярбурга Анатоль Кірвель. Яго знешне традыцыйная, а па сутнасці эксперыментальная проза дазваляе чытачу быць амаль сааўтарам твора: пісьменнік адно пазначае арыенціры, а астатняе чытач дамалёўвае сам, бо кожны з нас — патэнцыяльны творца.

Панізнік Сяргей. Крывіцкія руны: Беларускія пісьменнікі Латвіі. Мінск: Беларускі кнігазбор, 2003 Кніга выяўляе мацярык беларускай духоўнасці ў Латвіі, створаны мастацкім словам за апошнія 80 гадоў. Бальшыня аўтараў зборніка народжаныя на латгальскай зямлі. Многія нашыя суайчыннікі, далучаныя лёсам да суседняй дзяржавы, прадоўжылі творчыя райнісаўскія традыцыі прыязнасці, узаемапавагі, натхнёнай чыннасці дзеля ўмацавання векавога спараднення.

Петрашкевіч Алесь. Приласкать и уничтожить : гістарычная трагедыя. Мінск, 2008 Трагедыя «Приласкать и уничтожить!» ўяўляе сабой дакументальную рэстаўрацыю падзей, звязаных з Усебеларускім з’ездам 1917 года і стварэннем Беларускай Народнай Рэспублікі.

Сурвіла Івонка . Дарога: Стоўпцы - Капэнгаген - Парыж - Мадрыд - Атава - Менск, 2008 Прыгожая кніга самай прыгожай старшыні Рады БНР. У кнізе выкарыстаныя фатаздымкі Івонкі Сурвілы, Паўліны Сурвілы, Янкі Сурвілы, Лявона Шыманца, Сяр-гея Навумчыка, Уладзіслава Яндзюка, а таксама фота з архіваў сем'яў Шыманцоў і Сурвілаў.